فرانس: حکومتی تعاون سے ای کار لیزنگ، ماہانہ قسط صرف سو یورو

فرانسیسی دارالحکومت پیرس سے جمعہ پندرہ دسمبر کو ملنے والی رپورٹوں کے مطابق صدر ایمانوئل ماکروں کی طرف سے الیکٹرک یا ای کاروں کے استعمال کو زیادہ رواج دینے کے لیے اعلان کردہ اس پیشکش کا دوہرا مقصد ہے۔

جرمنی میں الیکٹرک کاروں کی سولر پاور سے چارجنگ، نئی فنڈنگ

ایک تو یہ کہ فرانس میں معدنی ایندھن یعنی پٹرول یا ڈیزل سے چلنے والی گاڑیوں کے بجائے زیادہ ماحول دوست الیکٹرک گاڑیوں کی خریداری کی حوصلہ افزائی کی جائے اور دوسرے یہ کہ کم آمدنی والے فرانسیسی شہریوں کے لیے بھی ای کاروں تک جلد رسائی کو آسان بنایا جائے۔

اولین مقصد کن شہریوں کی مدد؟

فرانسیسی صدر ایمانوئل ماکروں کے مطابق اس پیشکش کا بنیادی مقصد کم آمدنی والے ان ملکی کارکنوں کی مدد کرنا ہے، جو اپنے کام کی جگہوں تک پہنچنے کے لیے کار استعمال کرنے پر مجبور ہوں اور جن کی جائے روزگار ان کی رہائش سے کم از کم 15 کلومیٹر دور ہو۔

اس منصوبے پر عمل درآمد عنقریب شروع ہونے والے نئے سال 2024ء سے ہو گا اور کسی عام کار کی لیزنگ کے لیے کسی بھی صارف کو ماہانہ صرف 100 یورو کی قسط اد اکرنا ہو گی۔ اگر ای کار تھوڑی سے بڑی ہوئی، تو ماہانہ قسط 150 یورو تک ہو گی۔

فوکس واگن نے کھوئی ہوئی پوزیشن ٹیسلا سے واپس حاصل کر لی

الیکٹرک گاڑیوں کے ٹائر آلودگی کے لیے ایک نیا درد سر

توقع ہے کہ فرانس میں اگلے برس اس سکیم کے تحت 20 ہزار سے لے کر 25 ہزار تک شہری ایسی الیکٹرک گاڑیوں کے حصول کے لیے لیزنگ معاہدوں پر دستخط کر دیں گے۔

بعد ازاں اس منصوبے میں نئی الیکٹرک کاروں کی دستیابی کے مجموعی حجم کو مدنظر رکھتے ہوئے توسیع بھی کر دی جائے گی۔

الیکٹرک کاریں کن کمپنیوں کی تیار کردہ؟

پیرس حکومت نے اس منصوبے کے تحت جن کار ساز اداروں کی تیار کردہ الیکٹرک گاڑیوں کے مختلف ماڈلز کی لیزنگ کا ذکر کیا ہے، ان میں فرانسیسی کمپنیوں رینو، پیئجو اور سِٹروئن بھی شامل ہیں اور اوپل اور فیئٹ جیسے ادارے بھی۔

اہم بات یہ ہے کہ ایسی کسی بھی ای کار کی قیمت 47 ہزار یورو سے کم اور اس کا وزن 2.4 ٹن سے کم ہونا چاہیے۔ اس سکیم کا اطلاق صرف نئی الیکٹرک گاڑیوں پر ہی نہیں بلکہ استعمال شدہ ای کاروں پر بھی ہو گا۔

’سفید سونا‘ الیکٹرک گاڑیوں کے لیے کتنا ضروری؟

فرانسیسی عوام سے اس سکیم کا وعدہ صدر ایمانوئل ماکروں نے گزشتہ برس اپنی اس صدارتی انتخابی مہم کے دوران کیا تھا، جس کے بعد وہ دوسری مرتبہ سربراہ مملکت منتخب ہوئے تھے۔

حکومتی بونس صرف یورپ میں تیار کردہ الیکٹرک گاڑیوں کے لیے

پیرس میں ملکی حکومت کے اعلان کے مطابق رواں ماہ کے وسط سے فرانس میں نئی اور زیادہ ماحول دوست الیکٹرک کاروں کی خریداری کے لیے حکومت کی طرف سے دیا جانے والا بونس صرف ایسی کاروں کے لیے دیا جائے گا، جو یورپ ہی میں تیار کردہ ہوں۔

بھارت نے سستی ترین الیکٹرک کار متعارف کرا دی

صدر ماکروں کے الفاظ میں، ''اس سکیم کا ایک مقصد یہ بھی ہے کہ عام فرانسیسی شہریوں کی ایسی الیکٹرک کاروں کے حصول اور استعمال میں  مدد کی جائے، جو ان کے اپنے ہی ملک میں تیار کی گئی ہوں۔‘‘

صدر ایمانوئل ماکروں نے فرانس میں تیا رکردہ الیکٹرک گاڑیوں کی پیداوار میں اضافے کا جو ہدف مقرر کیا ہے، اس کے تحت یورپی یونین کے رکن اس ملک میں 2027ء تک سالانہ ایک ملین تک ای کاریں تیار کی جانا چاہییں۔

م م / ع ا (ڈی پی اے)