عمران خان کو راحت، عبوری ضمانت میں توسیع

پاکستان کے سابق وزیر اعظم عمران خان کو منگل کے روز اس وقت ایک بڑی راحت ملی جب اسلام آباد کی انسداد دہشت گردی عدالت نے مارچ میں عدالتی احاطے میں تشدد سے متعلق سات مقدمات میں آٹھ جون تک گرفتاری سے عبوری ضمانت دے دی۔

تحریک انصاف پارٹی کے چیئرمین 70 سالہ عمران خان کے خلاف یہ مقدمات اسلام آباد میں مختلف تھانوں میں اس وقت درج کرائے گئے تھے جب عدالت میں پیشی کے دوران ان کے حامیوں اور پولیس کے درمیان 18مارچ کو پرتشدد تصادم ہوئے تھے۔

فوری گرفتاری کا خطرہ ٹلنے کے بعد عمران خان کا اگلا ہدف کیا؟

یہ تصادم اس وقت پیش آئے جب عمران خانہ کو توشہ خانہ کیس میں سماعت کے لیے عدالت میں پیش کیا گیا تھا۔ تصادم کے دوران 25 سے زائد سکیورٹی اہلکاربھی زخمی ہوگئے تھے۔

عدالت نے وکلاء کے دلائل سننے کے بعد عمران خان کو آٹھ جون تک عبوری ضمانت دے دی۔

پی ٹی آئی کے کارکنو ں کے خلاف کارروائیاں

یہ پیش رفت ایسے وقت ہوئی ہے جب اس ماہ کے اوائل میں عمران خان کو گرفتار کرنے کے بعد ان کے ہزاروں حامیوں نے پرتشدد مظاہرے کیے۔

 مظاہرین نے سرکاری اثاثوں اور فوجی تنصیبات کو بھی نشانہ بنایا تھا۔ ان واقعات کے بعد حکام نے عمران خان کے حامیوں کو گرفتار کرنے کا سلسلہ شروع کر رکھا ہے۔ ان کے ہزاروں کارکنوں کے علاوہ پارٹی کے اہم رہنماوں کو بھی گرفتار کرلیا گیا ہے۔

پاکستان: پی ٹی آئی رہنماؤں کی گرفتاریوں کا سلسلہ جاری

سپریم کورٹ نے تاہم بعد میں عمران خان کو رہا کرنے کا حکم دیا تھا لیکن اس دوران پولیس کے ساتھ تشدد میں کم از کم دس افراد ہلاک ہوچکے ہیں۔

خیال رہے کہ دو روز قبل عمران خان نے ایک غیر ملکی میڈیا کو انٹرویو دیتے ہوئے آج منگل کے روز عدالت میں پیشی کے دوران اپنی ممکنہ گرفتاری کا خدشہ ظاہر کیا تھا۔ انہوں نے کہا تھا کہ ملک میں قانون نام کی کوئی چیز نہیں رہ گئی ہے اور مجھے کسی بھی چیز پر گرفتار کیا جاسکتا ہے۔

بشریٰ بی بی کی قبل از گرفتاری عبوری ضمانت منظور

اسلام آباد کی احتساب عدالت نے عمران خان کی اہلیہ بشریٰ بی بی کی ضمانت قبل از گرفتاری کی درخواست منظور کرلی۔ انہیں 31مئی تک عبوری ضمانت دی گئی ہے۔

عدالت نے القادر ٹرسٹ کیس میں پانچ لاکھ روپے مچلکے کے عوض بشریٰ بی بی کی درخواست ضمانت منظور کی ہے۔

اس سے قبل لاہور ہائی کورٹ نے اسی مقدمے میں بشریٰ بی بی کی ضمانت قبل از وقت گرفتاری کی درخواست منظور کرتے ہوئے انہیں 23 مئی تک متعلقہ عدالت میں پیش ہونے کا حکم دیا تھا۔

دریں اثنا احتساب عدالت میں پیشی کے بعد عمران خان اپنی اہلیہ کے ساتھ راولپنڈی میں نیب کی عدالت پہنچ گئے ہیں۔ جہاں القادر ٹرسٹ کیس کی تحقیقات کے سلسلے میں ان سے پوچھ گچھ کی جا رہی ہے۔

آئیے غریب کے عمران خان سے ملیے!

 گزشتہ برس اپریل میں پارلیمان میں عدم اعتماد کی تحریک کے ذریعہ عمران خان کو اقتدار سے برطرف کردیا گیا تھا۔ ان کا کہنا ہے کہ انہیں غیر قانونی طریقے سے عہدے سے معزول کیا گیا ہے اور اس کے بعد سے وہ اپنے جانشین وزیر اعظم شہبا ز شریف کی حکومت کے خلاف مسلسل مہم چلارہے ہیں۔

ج ا/ص ز (اے پی، نیوز ایجنسیاں)