جنگی طیاروں کی ڈیل میں مبینہ بدعنوانی، ’چھان بین نہیں ہو گی‘

بھارتی سپریم کورٹ نے جمعے کے دن رافیل جنگی طیاروں کی ڈیل میں مبینہ بدعنوانی کی چھان بین کی خاطر دائر کردہ متعدد درخواستوں کو رد کر دیا۔ اس کا مطلب ہے کہ بھارت اور فرانس کے مابین سن دو ہزار سولہ میں طے پانے والی اس ڈیل میں مبینہ بے ضابطگیوں کی تفتیش نہیں کی جائے گی۔ بھارتی سپریم کورٹ کے مطابق اس معاملے پر کوئی فیصلہ سنانا اس کا کام نہیں ہے۔

فیصلے میں ججوں نے کہا، ’’ہم یہ طیارے خریدے جانے کے محرکات کے بارے میں علم نہیں رکھتے ۔ ۔ ۔ یہ عدالت کا کام نہیں کہ وہ مختلف قیمتوں کے مابین تقابلی جائزے کرے، جو لازمی طور پر خفیہ ہی رکھے جاتے ہیں۔‘‘ اس فیصلے میں مزید کہا گیا کہ اس ڈیل میں اقربا پروری بھی نظر نہیں آتی۔

ایسے الزامات عائد کیے جاتے رہے ہیں کہ اس ڈیل میں بڑے پیمانے پر بدعنوانی کی گئی تھی اور اسی تناظر میں بھارتی وزیر اعظم نریندر مودی سے یہ مطالبہ بھی کیا گیا تھا کہ وہ مستعفی ہو جائیں۔ تاہم اب سپریم کورٹ کے اس فیصلے کے نتیجے میں بھارتیہ جنتا پارٹی کی حکومت کو کچھ سکون ملے گا، جو اس ڈیل پر تنقید کی وجہ سے شدید مشکل میں رہی ہے۔

بھارت نے فرانس سے 36 رافیل طیارے خریدنے کی ایک ڈیل کو حتمی شکل دی تھی۔ الزام ہے کہ ان طیاروں کی قیمت اصل سے زیادہ ادا کی گئی تھی اور خریداری کے عمل کو شفاف نہیں رکھا گیا تھا۔ اس کے علاوہ یہ الزام بھی عائد کیا جاتا ہے کہ اس ڈیل میں بھارتی حکومت نے مقامی پارٹنرز کے چناؤ میں اقربا پروری سے کام لیا تھا۔

دفاعی تجزیہ نگاروں کا کہنا ہے کہ ان جدید طرز کے جنگی طیاروں کے باعث بھارتی فضائیہ میں بہتری آئے گی، جو ابھی تک روسی ساخت کے MiG-21 طیارے استعمال کر رہی ہے۔ ان روسی طیاروں کو ان کے سیفٹی ریکارڈ کے باعث ’اڑتے تابوت‘ بھی کہا جاتا ہے۔

بھارتی سیاسی اور دفاعی تجزیہ نگاروں کے مطابق بھارت کو ہمسایہ ملک چین کی طرف سے دفاعی صلاحیتوں میں اضافے کے جواب کے طور پر اور اپنے روایتی حریف ملک پاکستان سے بڑھتی ہوئی کشیدگی کے باعث اپنی دفاعی صلاحیتوں کو بہتر بنانے کی ضرورت ہے۔ دوسری طرف کچھ ناقدین کے مطابق اس ڈیل کے باعث خطے میں ہتھیاروں کے حصول کی دوڑ میں تیزی آ جائے گی۔

ع ب / م م / خبر رساں ادارے