مشرقی یوکرین پر روسی حملوں میں کم از کم 21 افراد ہلاک

ڈونیٹسک خطے کے گورنر نے بتایا کہ منگل کے روز مشرقی یوکرین پر روسی حملوں میں کم از کم 21شہری ہلاک اور 27دیگر زخمی ہوگئے۔ یہ ایک ماہ کے دوران کسی ایک دن اب تک کی سب سے زیادہ ہلاکتیں ہیں۔

ڈونیٹسک کے گورنر پاولو کرائلینکونے ٹیلی گرام پر بتایا، "اودیویکا کوک پلانٹ پرروسی قابضین کی گولہ باری کے نتیجے میں کم از کم 10افراد ہلاک اور 15زخمی ہوگئے۔"

یہ کوک پلانٹ یورپ کے سب سے بڑے کوک پلانٹس میں سے ایک ہے۔ حالیہ برسوں کے دوران یوکرینی فوج کے ساتھ محاذ آراء  روسی حمایت یافتہ علیحدگی پسند فورسز اس پلانٹ کو حملے کا اکثر نشانہ بناتی رہی ہیں۔

گورنر کرائلینکو نے مزید بتایا کہ لائمن قصبے پر گولہ باری میں مزید پانچ افراد جب کہ ووگیلڈار قصبے پر گولہ باری میں چار افراد ہلاک ہوگئے۔ ان کے علاوہ ولائیکا نووسیلکا اور شینڈری گلوو گاوں میں ایک ایک شخص ہلاک ہوا۔

کرائلینکو نے بتایا کہ ایک ماہ قبل کراماٹورسک شہر میں ایک ریلوے اسٹیشن پرروسی حملے میں 59افراد کی ہلاکت کے بعد سے کسی ایک دن میں روسی فوجی کارروائیوں میں یہ ہلاکتوں کی سب سے زیادہ تعداد ہے۔

انہوں نے کہا،"ہماری سرزمین پر کیے جانے والے ایک ایک جرم کے لیے روس کو سزا ملے گی۔"

کرائلینکو نے کہا کہ اودیویکا پرروسیوں نے اس وقت حملہ کیا جب کارخانے میں کام کرنے والے افراد اپنی ڈیوٹی ختم کرنے کے بعد اپنے اپنے گھر جانے کے لیے بس اسٹاپ پر بس کے انتظار میں کھڑے تھے۔ انہوں نے کہا،"روسیوں کو یہ اچھی طرح معلوم تھا کہ وہ کس جگہ کو نشانہ بنارہے ہیں۔"

علیحدگی پسندوں کے کنٹرول والے ڈونیٹسک کے شمال میں واقع اودیویکا ایک صنعتی قصبہ ہے۔ روس نے حالیہ ہفتوں میں مشرقی ڈونباس خطے میں ان علاقوں پر حملے تیز کردیے ہیں جو کییف کے قبضے میں ہیں۔ ماسکو اب ان علاقوں پر اپنی توجہ مرکوز کررہا ہے۔

کوک ایک قسم کاایندھن ہوتا ہے جس میں کاربن کی مقدار کافی زیادہ ہوتی ہے۔ یہ ایک اہم صنعتی پروڈکٹ ہے جس کا استعمال بالخصوص لوہے کو پگھلانے میں ہوتا ہے تاہم یہ دیگر کاموں میں بھی ایندھن کے طورپر استعمال کیا جاتا ہے۔

ماسکو کییف کے ساتھ با ت چیت کے لیے تیارہے، پوٹن

روس کے صدر ولادیمیر پوٹن نے منگل کے روز اپنے فرانسیسی ہم منصب ایمانوئل ماکروں کے ساتھ ٹیلی فون پر تقریباً دو گھنٹے بات چیت کی۔

روسی خبر رساں ایجنسی تاس کے مطابق پوٹن نے ماکروں سے کہا کہ روس نے یوکرین کو مذاکرات کے اصولی طریقہ کار کے حوالے سے خاکہ پیش کیا ہے اور " کییف کی عدم مطابقت اور سنجیدگی سے کام کرنے کی عدم خواہش کے باوجود" اس سے بات چیت کے لیے تیار ہے۔

تاس کے مطابق پوٹن نے مغرب سے مطالبہ کیا کہ وہ یوکرین کو ہتھیاروں کی سپلائی کا سلسلہ بند کرے۔

 دونوں رہنماوں نے اس سے قبل 29 مارچ کو بات چیت کی تھی۔

ج ا/  ص ز (اے ایف پی، اے پی)