کرایہ پندرہ یورو مگر لیے پندرہ سو، ٹیکسی ڈرائیور گرفتار

فرانسیسی دارالحکومت پیرس میں پولیس نے ایک ایسے دھوکے باز ٹیکسی ڈرائیور کو گرفتار کر لیا ہے، جو مسافروں کو دھوکہ دیتے ہوئے کئی گنا زیادہ کرایہ وصول کرتا تھا۔

پیرس میں ای اسکوٹروں پر پابندی کا فیصلہ

پیرس سے شائع ہونے والے اخبار Le Parisien نے اپنی بدھ پانچ اپریل کی اشاعت میں پولیس کا حوالہ دیتے ہوئے لکھا کہ ایک واقعے میں تو اس 30 سالہ ٹیکسی ڈرائیور نے سواری سے 100 گنا زیادہ کرایہ وصول کیا۔

ہسپانوی سیاح سے لیا جانے والا سو گنا کرایہ

اس ٹیکسی ڈرائیور کی مجرمانہ سرگرمیوں کا نشانہ اکثر پیرس جانے والے غر ملکی سیاح بنتے تھے۔ یہ ڈرائیور پولیس کی نظروں میں اس وقت آیا جب اس نے ایک ہسپانوی شہری کے ساتھ بھی اسی طرح کی دھوکے بازی کی مگر اس سیاح نے اس کے خلاف پولیس کو شکایت کر دی۔

کوئی شکایت ہے تو رابطہ کریں، فرانسیسی ڈرگ ڈیلرز کا نوٹس

یہ ڈرائیور مسافروں سے کریڈٹ کارڈ کے ذریعے کرایہ وصول کرتے ہوئے بہانہ یہ بناتا تھا کہ اس کی کریڈٹ کارڈ ریڈنگ مشین درست کام نہیں کرتی، اس لیے مسافر صرف اپنے کارڈ کا پن نمبر ہی انٹر کرے اور کرائے کی رقم وہ خود انٹر کر دے گا۔

جرمنی: چالیس برس پہلے گم ہونے والا پرس خاتون کو واپس مل گیا

اس دوران یہ ملزم کارڈ ریڈنگ مشین پر نظر آنے والی کرائے کی رقم چھپانے کے لیے اس پر بظاہر معصومیت سے اپنا ہاتھ رکھ دیتا تھا اور مسافر کو علم نہیں ہو پاتا تھا کہ وہ کتنی رقم ادا کر رہا ہے۔

اس کی طرف سے غیر ملکی سیاحوں کے ساتھ کی جانے والی اس دھوکہ دہی کا پول اس وقت کھلا، جب اس نے ایک ہسپانوی سیاح سے بظاہر صرف 15.40 یورو کرایہ وصول کیا۔

لیکن یہ غیر ملکی اس وقت حیران رہ گیا، جب اس پر یہ انکشاف ہوا کہ اس نے تو اس ڈرائیور کی ٹیکسی میں چند منٹوں کے سفر کے لیے 1540 یورو کرایہ ادا کیا ہے۔

پیرس شہر کی تاریخ کا ایک نسوانی پہلو بھی ہے

صرف چند ماہ میں باسٹھ ہزار یورو ہتھیائے گئے

ملزم کی گرفتاری کے بعد دوران تفتیش پولیس کو پتہ چلا کہ اس نے گزشتہ چند ماہ کے دوران کم از کم 71 مسافروں سے اتنی زیادہ رقوم وصول کیں کہ ان کا مجموعہ 62 ہزار یورو بنتا تھا۔ بعد میں اس نے یہ رقوم یا تو کھیلوں کے مقابلوں کے نتائج پر سٹے بازی کے لیے خرچ کیں یا پھر پیرس کے بہت مہنگے ریستورانوں میں پرتعیش ضیافتوں پر۔

عشروں پہلے فرانس بھیجے گئے ’چوری شدہ‘ بچوں کے ہنوز جواب طلب سوالات

پولیس نے بتایا کہ ملزم کے مالی جرائم اس لیے سامنے نہیں آتے تھے کہ اس کے ہاتھوں لٹنے والے تقریباﹰ ہمیشہ ہی غیر ملکی سیاح ہوتے تھے اور وہ پیرس میں چند روز گزار کر واپس چلے جاتے تھے اور کوئی بھی ملزم کے خلاف پولیس کو شکایت نہیں کرتا تھا۔

1848ء پیرس کا انقلاب

گرفتاری کے بعد ملزم کے ڈرائیونگ لائسنس سے متعلقہ تفصیلات کا علم ہونے پر پولیس اہلکار یہ جان کر بھی حیران رہ گئے کہ وہ ٹیکسی کا باقاعدہ لائسنس رکھنے والے ڈرائیور تو تھا مگر ٹریفک قوانین کی کئی طرح کی خلاف ورزیوں کے بعد اس کا لائسنس  منسوخ کر دیا گیا تھا۔ گرفتاری سے پہلے اس نے دوبارہ لائسنس لینے کی خاطر ڈرائیونگ ٹیسٹ کے لیے اپنی رجسٹریشن بھی کروا رکھی تھی۔

م م / ش ر (ڈی پی اے، لپاریسیاں)