پشاور مسجد حملے میں ہلاکتیں پچاس سے زائد، دو سو کے قریب زخمی

یہ خود کش بم حملہ آج چار مارچ کے روز اس مسجد میں جمعے کی نماز کے دوران کیا گیا، جب یہ بڑی عبادت گاہ نمازیوں سے تقریباﹰ بھری ہوئی تھی۔ صوبائی حکام  اور مقامی طبی ذرائع نے جمعے کی شام تک ہلاکتوں کی مجموعی تعداد کم از کم بھی 56 اور زخمیوں کی تعداد 194 بتائی۔

پشاور کے لیڈی ریڈنگ ہسپتال کے ترجمان عاصم خان کے مطابق کئی زخمیوں کی حالت نازک ہے۔ انہوں نے بتایا کہ کئی زخمیوں کی جانیں بچانے کے لیے ان کے جسمانی اعضاء کاٹنا پڑے گئے۔ زیادہ تر زخمی وہ ہیں، جو بم دھماکے کے دوران اس بم کے اڑتے ہوئے حصے لگنے سے یا گرتے ہوئے ملبے کی زد میں آ کر زخمی ہوئے۔ 

آخری اطلاعات ملنے تک اس بم دھماکے کی ذمے داری کسی بھی گروپ نے قبول نہیں کی تھی۔ ماضی میں لیکن ایسے کئی خونریز حملے ممنوعہ عسکریت پسند تنظیم تحریک طالبان پاکستان اور دہشت گرد تنظیم داعش کی طرف سے کیے جاتے رہے ہیں، جن کی ان شدت پسند گروپوں نے باقاعدہ ذمے داری بھی قبول کر لی تھی۔

ہر مکتبہ فکر کے نمائندوں کی طرف سے حملے کی مذمت

پشاور میں آج کے اس خونریز بم حملے کی ہر مکتبہ فکر کے نمائندوں نے بھرپور مذمت کی ہے۔ اس بم دھماکے کے بارے میں تجزیہ نگار اور ماضی میں سابقہ قبائلی علاقوں کے سیکرٹری کے فرائض انجام دینے والے بریگیڈیئر ریٹائرڈ محمود شاہ نے ڈی ڈبلیو سے گفتگو کرتے ہوئے کہا، ''افغانستان میں اب بھی ایسے عناصر موجود ہیں، جنہیں بھارت سے مالی وسائل ملتے ہیں۔ انہیں جب بھی ادائیگیاں ہوتی ہیں، وہ متحرک ہو جاتے ہیں۔ یہ لوگ انتہائی خطرناک ہو سکتے ہیں۔‘‘

ان کا کہنا تھاکہ آج کے بم حملے کے بعد بھی ایسی مزید دہشت گردی کا خدشہ موجود ہے اور ان خطرات کے تدارک کے لیے سکیورٹی انتظامات مزید سخت کرنے کی ضرورت ہے۔ محمود شاہ کے مطابق، ''افغانستان سے علاج کے لیے آنے والے کسی بھی مریض کے ساتھ دو تین افراد کو بغیر ویزے کے آنے کی اجازت دے دی جاتی ہے۔ اس طرح مشکوک افراد بھی پاکستان آ سکتے ہیں۔ آنے والوں سے یہ بھی معلوم کرنا چاہیے کہ وہ کہاں اور کس کے پاس ٹھہریں گے۔ اسی طرح پاکستان میں مقیم افغان باشندوں کے ڈیٹا پر بھی نظرثانی کی ضرورت ہے۔ افغانستان کے ساتھ سرحد پر سکیورٹی انتظامات تو بہرحال مزید سخت کیے جانا چاہییں۔‘‘

صوبائی کابینہ کا ہنگامی اجلاس

آج کے خود کش بم حملے کے بعد صوبائی وزیر اعلیٰ محمود خان نے خیبر پختونخوا میں سکیورٹی کی ‌صورت حال کا جائزہ لینے کے لیے اپنی کابینہ کا ایک ہنگامی اجلاس بھی طلب کرلیا۔ انہوں نے کابینہ کے وزراء کو فوری طور پر ہسپتال جانے اور زخمیوں کی عیادت کرنے کی ہدایت کی۔

وزیر اعلیٰ کی ہدایت پر لیڈی ریڈنگ ہسپتال پہنچنے والے ان کے خصوصی معاون برائے اطلاعات بیرسٹر محمد علی سیف نے ڈی ڈبلیو کو بتایا، ''ہسپتال میں ایمرجنسی نافذ کر دی گئی ہے۔ زخمیوں کا علاج جاری ہے اور انہیں جملہ سہولیات مہیا کی جا رہی ہیں۔ کئی زخمیوں کی حالت نازک ہے۔‘‘ انہوں نے کہا کہ حکومت آئندہ بڑے عوامی اجتماعات کو زیادہ مؤثر سکیورٹی فراہم کرے گی۔‘‘

پشاور میں حکومتی ارکان کے علاوہ اپوزیشن سے تعلق رکھنے والے مولانا فضل الرحمان، قومی وطن پارٹی کے سربراہ آفتاب احمد خان شیرپاؤ، پاکستان تحریک انصاف کے ترجمان محمد عاصم خان، مسلم لیگ (ن) کے رہنما امیر مقام، عوامی نیشنل پارٹی کے امیر حیدر خان، ایمل ولی خان اور خیبر پختونخوا اسمبلی کے اسپیکر مشتاق احمد غنی نے بھی اس خود کش بم دھماکے کی پرزور مذمت کی ہے اور ہلاک شدگان اور زخمیوں کے اہل خانہ سے ہمدردی کا اظہار کیا ہے۔

صوبائی پولیس کے ذرائع نے بتایا کہ پشاور میں کوچہ رسالدار نامی علاقے میں شیعہ مسلمانوں کی مسجد پر کیے گئے بم حملے کے بعد وزیر اعلیٰ کی ہدایت پر پولیس نے اپنے مجموعی سکیورٹی انتظامات مزید سخت کر دیے ہیں۔