سعودی عرب کی انڈین پریمیئر لیگ میں دلچسپی

امریکی خبررساں ادارے بلوم برگ میں شائع ہونے والی ایک رپورٹ میں کہا گیا ہے کہ سعودی عرب نے بھارت کی انڈین پریمیئر لیگ (آئی پی ایل) کے اربوں ڈالر کےحصص خریدنے میں دلچسپی ظاہر کی ہے۔

ذرائع پر مبنی اس رپورٹ کے مطابق کہ سعودی عرب کے ولی عہد شہزادہ محمد بن سلمان کے مشیروں نے بھارتی حکومت کے نمائندوں سے آئی پی یل کو 30 ارب ڈالر مالیت کی ایک ہولڈنگ کمپنی کا حصہ بنانے کے بارے میں بات کی ہے۔  

رپورٹ میں کہا گیا ہے کہ سعودی اور بھارتی نمائندوں کے مابین اس بارے میں پہلی مرتبہ بات ستمبر میں شہزادہ سلمان کی بھارت کے دورے کے دوران ہوئی تھی۔

بلوم برگ کی رپورٹ کے مطابق سعودی عرب نے آئی پی ایل میں پانچ ارب ڈالر کی سرمایہ کاری اور اس کرکٹ لیگ  کو دیگر ممالک تک پھیلانے میں مدد کرنے کی پیشکش کی تھی۔

اس رپورٹ میں مزید کہا گیا ہے کہ بھارتی حکومت اور کرکٹ بورڈ متوقع طور پر اس حوالے سے اگلے سال انتخابات کے بعد کوئی فیصلہ کریں گے۔

بلوم برگ کے مطابق اس بات کا امکان بھی ہے کہ اگر بھارتی کرکٹ بورڈ سعودی عرب کی پیشکش پر آمادگی ظاہر کرتا ہے تو سعودی حکومت حتمی معاہدہ طے کرنے کے لیے اپنے سوورین ویلتھ فنڈ کا استعمال کرے گی۔ لیکن اس حوالے سے ابھی کوئی حتمی فیصلہ نہیں کیا گیا ہے۔

بھارتی کرکٹ بورڈ، جو کہ آئی پی ایل کا نگران ادارہ ہے، نے روئٹرز کی اس خبر کے حوالے سے بات کرنے کی درخواست پر فوری طور پر کوئی جواب نہیں دیا۔

 دنیا میں کرکٹ کی امیر ترین لیگ

آئی پی ایل لیگ کا آغاز 2008ء میں کیا گیا تھا اور تب ہی سے دنیا بھر سے بہترین کوچز اور کھلاڑی اس میں حصہ لے رہے ہیں۔ آج اس کا شمار کھیل کی دنیا کی سب سے امیر ترین لیگز میں کیا جاتا ہے۔

دوسری جانب سعودی عرب نے گزشتہ کچھ سالوں میں کھیلوں پر کافی توجہ دی ہے اور اس شعبے میں سرمایہ کاری بھی کی ہے۔ بلوم برگ کی رپورٹ کے مطابق سعودی عرب میں کھیلوں کی گورننگ باڈی کے چیئرمین نے ایک موقع پر یہ بھی کہا تھا کہ وہ اس ملک کو کرکٹ کی بین الاقوامی ڈیسٹینیشن میں تبدیل کرنا چاہتے ہیں۔

 م ا /ع ا (روئٹرز)