افغان سرحد سے ملحقہ قبائلی اضلاع میں پولیو مہم

بچوں کو پولیو سے بچاؤ کی مہم چلانے والی ٹیموں کو زیادہ تر ضم قبائلی اضلاع میں نشانہ بنایا جاتا ہے۔ انسداد پولیو کے لیے کام کرنے والے بین الااقومی اداروں کی تمام تر کوششوں کے باجود پختونخوا کے بعض اضلاع میں رائے عامہ ہموار کرنے میں یہ ٹیمیں کامیاب نہ ہوسکیں جسکی وجہ سے رواں مہم کے تیسرے روز  13 ہزار سے زیادہ والدین بچوں کو پولیو کے قطرے پلانے سے انکاری ہیں۔ پشاور میں صوبائی سطح پر انسداد پولیو کے ایمرجنسی آپریشنز سینٹر کے مطابق 22 مئی سے صوبے کے تیرہ اضلاع سمیت افغان مہاجرین کے آٹھ کیمپوں میں پانچ سال سے کم عمر کے 35 لاکھ سے زیادہ بچوں کو پولیوسے بچاؤ کے قطرے پلائے جائیں گے ۔ جبکہ مہم کے دوسرے مرحلے میں پاک افغان سرحدی علاقوں اور پختونخوا کے دیگر اضلاع میں بچوں کو پولیو سے بچاؤ کے لیے قطرے پلائے جائیں گے۔‘‘

 

 

سکیورٹی اقدامات

پولیو مہم کے لیے اس بار بھی اکیس ہزار سے زیادہ پولیس اہلکاروں کی خدمات حاصل کی گئیں تاہم اس بار بھی جمعرات کے روز افغان سرحدی ضلع خیبر کے تحصیل باڑہ میں پولیو ٹیم کی سکیورٹی پر مامور پولیس اہلکاروں کو نشانہ بنایا گیا ۔ ضلع خیبرکے پولیس اہلکار مسلم خان نے میڈیا کو بتایا ،''پولیس نفری پر فائرنگ کے ساتھ ساتھ دستی بم سےحملہ کیا گیا جس سے تین اہلکار زخمی ہوئے۔‘‘

 انکا مزید کہنا تھا کہ اس حملے میں خود کار اسلحہ استعمال کیا گیا حملے کے بعد عسکریت پسند فرار ہوگئے تاہم ان کی  گرفتاری کے لیے سرچ آپریشن شروع کردیا گیا ہے۔ ادھر ضلع خیبر کے ضلعی پولیس افسر سلیم عباس کلاچوی نے میڈیا کو بتایا، ''سال رواں کے دوران ضلع خیبر میں پولیو مہم  کے دوران ڈیوٹی دینے والے تین پولیس اہلکار جان بحق جبکہ چھ زخمی ہوئے ہیں ۔‘‘

افغان سرحد کے ساتھ ملحقہ قبائلی اضلاع اس حوالے سے حساس قرار دیے جاتے ہیں ضلع مہمند میں پولیو مہم سے قبل ہی داخلی اور خارجی راستوں پر پولیس کے خصوصی دستے تعینات کیے گئے ہیں ناکہ بندی کے دوران ہر کسی کو روک کران سے پوچھ گچھ کی جاتی ہے۔

پولیو مہم  کے دوران امن و امان کو یقینی بنانے کے لیے  پولیس کے 21 ہزار سے زیادہ اہلکار تعینات کیے گئے ہیں  اس کے باوجود پولیو ڈیوٹی کرنے والے پولیس اہلکاروں کو نشانہ بنایا جاتا ہے۔

پولیس کا موقف

پولیس کے ڈائریکٹر پبلک ریلیشن شہزادہ کوکب فاروقی نے بتایا، ''پولیس شہدا ہمارا قومی سرمایہ ہیں۔ شہدا کے ورثا کے لیے مالی معاونت کے پیکیج میں حال ہی میں اضافہ کیا گیا اور اب شہید ہونے والے کانسٹبل سے لے کر انسپکٹر تک کے لیے  ڈیڑھ  کروڑ روپے جبکہ انسپکٹر سے اے آئی جی تک کے لیے دو کروڑ روپے کا پیکج منظور کیا گیا ہے۔‘‘ انکا مزید کہنا تھا کہ شہدا کے بچوں کی تعلیم اور صحت کے اخراجات بھی پولیس ویلفیئر سے ادا کیے جاتے ہیں جبکہ شہدا کے بچیوں کے لیے جہیز کا پیکج بھی منظور کیا گیا ہے۔‘‘

 دوسری جانب پولیو مہم میں حصہ لینے والے پولیس کے بعض اہلکاروں نے شکایت کی ہے کہ انہیں پولیو مہم میں ڈیوٹی دینے کا معاوضہ ادا نہیں کیا گیا۔ انسپکٹر جنرل پولیس اختر حیات گنڈا پور نے اسکا نوٹس لیتے ہوئے پولیو میں ڈیوٹی انجام دینے والے کانسٹیبل کو ادائیگی کا ریکارڈ طلب کرکے اس کی باقاعدہ تحقیقات کی ہدایت کی ہے۔

یہ بات قابل ذکر ہے کہ سال 2012 ء   سے اب تک پولیو مہم کے دوران ڈیوٹی دینے والے 101پولیس اہلکاروں کو نشانہ بنایا گیا جبکہ اس فائرنگ کے نتیجے میں 141 پولیس اہلکار زخمی ہوئے ہیں ۔