چین کی جانب سے امریکی پارلیمانی اسپیکر پر پابندیاں عائد

چین کا کہنا ہے کہ امریکہ کے کسی اعلیٰ عہدیدار کی طرف سے تائیوان کا دورہ کرنا دراصل بیجنگ کی خودمختاری کو چیلنج کرنے کے مترداف ہے۔ چینی وزارت خارجہ نے مزید کہا کہ نینسی پیلوسی نے تائیوان کا دورہ کر کے چین کے داخلی معاملات میں سنگین دخل اندازی کرنے کے علاوہ ریاستی حاکمیت اعلیٰ اور سرحدی سالمیت کی خلاف ورزی بھی کی ہے۔

بیجنگ حکومت 'ون چائنا پالیسی‘ کے تحت تائیوان کو اپنا 'اٹوٹ انگ‘مانتی ہے تاہم اس جزیرے میں قائم خود ساختہ حکومت تائیوان کو ایک آزاد ریاست قرار دیتی ہے۔

چینی وزارت خارجہ کی طرف سے جاری کردہ ایک بیان کے مطابق بیجنگ حکومت نے پیلوسی اور ان کے قریبی رشتہ داروں پر پابندیاں عائد کرنے کا فیصلہ کیا ہے۔ تاہم اس حوالے سے مزید معلومات فراہم نہیں کی گئی ہیں۔

چینی حکومت بارہا کہہ چکی ہے کہ تائیوان چین کا ایک صوبہ ہے اور اگر اس نے آزادی حاصل کرنے کی کوشش کی تو بیجنگ حکومت طاقت کے استعمال سے بھی گریز نہیں کرے گی۔

امریکی ایوان نمائندگان کی اسپیکر کی طرف سے تائیوان کا دورہ کرنے کی وجہ سے چین نے شدید ردعمل ظاہر کیا ہے۔ بیجنگ نے پیلوسی کے اس دورے سے قبل اور بعد میں تائیوان کا محاصرہ کرتے ہوئے فوجی مشقیں بھی کی ہیں۔

چین نے جمعے کے دن بتایا ہے کہ جزیرہ نما تائیوان کے ارد گر ایک سو جنگی جہازوں اور دس جنگی بحری جہازوں نے دو دن تک فوجی مشقیں کیں۔

امریکہ کا کہنا ہے کہ وہ تائیوان کے ساتھ ہے۔ ایشیا کے دورے پر اس وقت جاپان میں موجود نینسی پیلوسی نے صحافیوں سے گفتگو میں کہا کہ واشنگٹن حکومت چین کی طرف سے تائیوان کا 'اکیلا‘ کرنے کی کوششوں کو کامیاب نہیں ہونے دے گی۔

ع ب/ رب (روئٹر‍ز)