بھارت میں بڑے امریکی اداروں کی سرمایہ کاری، مودی کی چاندی

بھارت میں اگلے برس عام انتخابات سے پہلے وزیر اعظم نریندر مودی کے دور میں غیر ملکی سرمایہ کاری میں زبردست اضافے سے ملازمتوں کے نئے مواقع پیدا ہو رہے ہیں۔ یوں مودی الیکشن سے پہلے اپنا ووٹ بینک مضبوط تر بناتے جا رہے ہیں۔

ایمیزون سے لے کر وال مارٹ تک، بھارت میں غیر ملکی بالخصوص بڑے امریکی اداروں کی سرمایہ کاری میں واضح اضافہ نہ صرف ملکی معیشت کے لیے خوش آئند اور مزید ترقی کا ضامن ہے بلکہ یہ اقدامات وزیر اعظم نریندر مودی کو آئندہ سال ہونے والے عام انتخابات سے پہلے اپنی عوامی مقبولیت میں اضافے کا بہترین موقع بھی فراہم کر رہے ہیں۔

بھارت میں بڑی بڑی غیر ملکی کمپنیوں کی طرف سے سرمایہ کاری کے سلسلے کی تازہ ترین کڑی  ایمیزونکے کلاؤڈ کمپیوٹنگ ڈویژن کی طرف سے جمعرات 18 مئی کو کیا جانے والا یہ اعلان ہے کہ وہ دنیا کے سب سے زیادہ آبادی والے ملک بھارت میں بڑی سرمایہ کاری کرے گا۔

بڑی امریکی کمپنیوں کی طرف سے بھارت میں سرمایہ کاری کے تازہ ترین اعلانات کی چند اہم تفصیلات:

ایمیزون ویب سروسز

ملٹی نیشنل امریکی ٹیکنالوجی کمپنی جس کا مرکزی کام  ای کامرس اور کلاؤڈ کمپیوٹنگ ہے، 1994ء میں وجود میں آئی تھی۔ ایمیزون ویب سروسز نے اعلان کیا ہے کہ وہ بھارت میں 13 بلین ڈالر کی سرمایہ کاری کا منصوبہ بنا چکی ہے۔ بھارت 2030ء تک اپنے ڈیٹا کلاؤڈ انفراسٹرکچر کی جو تعمیر و تجدید کرے گا، اس سے اس جنوبی ایشیائی ملک میں نئی ملازمتوں کے ہزارہا مواقع پیدا ہوں گے۔

ایپل

بہت بڑی امریکی ٹیکنالوجی کمپنی ایپل  نے ابھی گزشتہ ماہ ہی بھارت میں اپنا پہلا اسٹور ممبئی میں اور پھر اگلا نئی دہلی میں لانچ کیا تھا۔ ایپل نے بھارت کو اپنا ایک بڑا پیداواری مرکز  بنانے کی کوششیں شروع کر رکھی ہیں۔ اس کے لیے ایپل نے الیکٹرانکس اور الیکٹرانک پرزہ جات تیاری کرنے والی کمپنیوں فوکس کون، وِنسٹرون کارپوریشن اور پیگاٹرون کارپوریشن کو اپنے لیے مصنوعات تیار کرنے کے ٹھیکے دیے ہیں اور ان کے ذریعے وہاں کئی مصنوعات تیار کرنا شروع بھی کر دی گئی ہیں۔

امریکی کمپنی ایپل کے سی ای او ٹم کُک نے ابھی گزشتہ ماہ ہی بھارت کے اپنے ایک دورے کے دوران کہا تھا، ''ہم ملک بھر میں ترقی اور سرمایہ کاری کے لیے پرعزم ہیں۔‘‘

فوکس کون

تائیوانی کنٹریکٹ مینوفیکچرر بھارت کی جنوبی ریاست تلنگانہ  میں 500 ملین ڈالر کی سرمایہ کاری کرنے کا ارادہ رکھتا ہے جبکہ تلنگانہ کی پڑوسی بھارتی ریاست کرناٹک میں یہی ادارہ تقریباً 968 ملین ڈالر کی لاگت سے پلانٹ لگانے کا منصوبہ بھی رکھتا ہے۔ حکام کے مطابق اس سرمایہ کاری سے بھارت میں روزگار کے 70 ہزار سے زائد نئے مواقع پیدا ہونے کی امید ہے۔

ایپل سپلائرز بھارت میں ایک ایسی فیکٹری لگانے کا ارادہ بھی رکھتے  ہیں، جہاں وائرلیس ایئر فونز اورایپل ایئر پوڈز تیار کیے جائیں گے۔

سِسکو سسٹمز

نیٹ ورکنگ آلات بنانے والی یہ امریکی کمپنی اپنی عالمی سپلائی چین کو زیادہ متنوع بنانے کے لیے بھارت میں مینوفیکچرنگ شروع کر دے گی۔ اس کمپنی نے بھارت میں اگلے چند سالوں میں پیداوار اور برآمدات کے شعبے کے لیے ایک بلین ڈالر کی سرمایہ کاری کا ہدف طے کر رکھا ہے۔

وال مارٹ

امریکی ریٹیل بزنس چین وال مارٹ یا کے سی ای او نے رواں ماہ بھارتی وزیر اعظم  نریندر مودی سے ملاقات کی اور اس عزم کا اعادہ کیا کہ ان کی کمپنی نے 2027 ء تک بھارت سے 10 بلین ڈالر مالیت تک کی برآمدات کی منصوبہ بندی کر رکھی ہے۔

ک م / م م (روئٹرز، اے پی)