آرکٹک میں بیج محفوظ کروانے والوں کی تعداد میں ریکارڈ اضافہ

آرکٹک میں زرعی فصلوں کو معدوم ہونے سے بچانے کے مقصد سے بنائے گئے ایک کمرہ نما 'والٹ' کو چلانے والے ادارے کروپ ٹرسٹ نے بتایا ہے کہ رواں ہفتے وہاں نو نئے 'سیڈ بینکس' نے بیج محفوظ کروائے ہیں، جو کہ ایک وقت میں وہاں بیج رکھوانے والے نئے سیڈ بینکس کی اب تک کی سب سے بڑی تعداد ہے۔

'اسویل باڈ گلوبل سیڈ والٹ' مین لینڈ یورپ اور قطب شمالی کے درمیان واقع ایک جزیرے پر پرما فراسٹ کے غاروں میں 2008ء میں بنایا گیا تھا۔ اس کو بطور ایک 'جین بینک' کے بنایا گیا ہے، جو کہ جنگوں، بیماریوں اور ماحولیاتی تبدیلیوں میں فصلوں اور پودوں کی حفاظت میں مددگار ثابت ہوگا۔

ناروے کی حکومت اور کروپ ٹرسٹ کی جانب سے مشترکہ طور پر چلائے جانے والے اس والٹ میں دنیا بھر سے بیج لا کر منفی 18 ڈگری سینٹی گریڈ پر محفوظ کیے جاتے ہیں۔ اس والٹ کو کھولا بھی سال میں تین بار ہی جاتا ہے تا کہ اس میں پہلے سے موجود بیج باہر کے ماحول سے کم سے کم متاثر ہوں۔

کروپ ٹرسٹ کے مطابق اس ہفتے منگل کو جب اسے کھولا گیا تو کل 23 سیڈ بینکس نے وہاں بیج محفوظ کروائے، جن میں سے نو ایسا پہلی بار کر رہے تھے۔ اس ادارے کی جانب سے مزید بتایا گیا ہے کہ ان نو نئے سیڈ بینکس کا تعلق بوسنیا ہرزیگووینا، کیمرون، انڈونیشیا، قازقستان، کینیا، مڈغاسکر، نائجیریا اور زیمبیا سے ہے اور منگل کے روز اسویل باڈ والٹ میں پھلیوں، جو، مکئی، چاول، باجرے اور جوار کے بیج محفوظ کروائے گئے۔

اس پیش رفت کے حوالے سے ناروے کی وزارت زراعت نے ایک بیان میں کہا ہے نئے بیجوں کی آمد کے بعد اس والٹ میں بیج محفوظ کروانے والے سیڈ بینکس کی کل تعداد اب 111 ہوگئی ہے اور ان سیڈ بینکس کا تعلق 77 ممالک سے ہے۔

بیجوں کو ذخیرہ اور محفوظ کرنے کے حوالے سے اسویل باڈ والٹ کا کردار بالخصوص 2015ء سے 2019ء تک شام میں ہونے والی جنگ کے دوران بہت اہم رہا ہے۔

اس سیڈ والٹ کے حوالے سے کروپ ٹرست کے ایگزیکٹِو ڈائریکٹر اسٹیفن شمٹز کا کہنا ہے اس کے ذریعے "جینیاتی تنوع کا تحفظ سے اس بات کو یقینی بناتا ہے کہ فصلیں مختلف ماحولیاتی تبدیلیوں اور حالات کے باوجود پنپ سکیں۔ اس طرح یہ "آنے والی نسلوں کے لیے غذائی تحفظ کی ضمانت ہے"۔

م ا، ع ت (روئٹرز)