په اسلام آباد کې د ترهګرۍ خطر؛ ښوونځي او پوهنتونونه تړل شوي
۱۴۰۲ بهمن ۲, دوشنبه
د آلمان خبري آژانس د دوشنبې په ورځ (۲۰۲۴م کال د جنورۍ ۲۲) د استخباراتي کړيو د معلوماتو په حواله ويلي دي چې په اسلام آباد کې د ترهګرۍ خطر په اړه خبرداری ورکړل شوی دی.
زياته شوې ده چې په اسلام آباد کې د دريو پوهنتونو په اړه چې د پوځ له خوا اداره کيږي، د ترهګریزو بريدونو ثابت ګواښونه موجود دي. خو د پاکستان د ډاون نيوز ورځپاڼې بيا د دې پوهنتونو شمير څلور ښوولی دی چې په دې کې د اير پوهنتون، نيشنل ډيفنس پوهنتون، بحريه پوهنتون او قايداعظم پوهنتون شامل دی.
پر دې سربیره د ښار څو خصوصي ښوونځي هم تړل شوي دي، خو د دولتي ښوونځيو او پوهنتونو د تړلو په اړه تر اوسه څه نه دي ويل شوي.
د معلومات لرونکو کړيو له خوا ويل شوي دي چې په ښار کې د پولیسو او پوځ حضور پياوړی شوی دی.
په پاکستان کې په دې وروستيو کې يو شميربريدونهشوي دي چې زياتره یې د اسلامپالو ډلو له خوا شوي دي.
په پاکستان کې د فيبرورۍ مياشتې پر اتمه نېټه د ملي او ايالتي پارلمانونو له پاره ټاکنې په نظر کې نيول شوي دي.
ب. ص/ ن. ز (dpa)