د پاکستان له زندانونو څخه د ۴۹ افغان کډوال ازادیدل

د ننګرهار ولایت د طالبانو د اطلاعاتو او کلتور رئیس قریشي بدلون، دویچه ویله ته وویل چې یاد افغان کډوال د قانوني اسنادو نه لرلو له کبله د پاکستان د امنیتي ځواکونو لخوا د دغه هېواد په پېښور او نورو ښارونو کې نیول شوي او بندیان شوي وو.

هغه زیاته کړه چې نوموړي کسان په پاکستان کې د افغانستان سفارت د هڅو په پایله کې له زندانونو څخه ازاد شوي او د تورخم په دروازه کې دوی ته سپارل شوي دي.

بدلون وویل چې هڅې روانې دي، څو د پاکستان له نورو زندانونو هم افغان بندیان آزاد کړل شي.

اړوند مطلب: 

د طالبانو چارواکي وایي چې د تېرو څو میاشتو په بهیر کې ۱۵۰۰ افغان کډوال چې د بیلابیلو جرمونو له وجې د پاکستان په زندانونو کې بندیان ول، د تورخم له لارې افغانستان ته انتقال شوي دي.