Скулптура со испружен прст на плоштад во Милано

Скулптурата со име L.O.V.E, што е акроним од „libertà, odio, vendetta, eternità“ (слобода, омраза, одмазда, вечност) е дело на италијанскиот уметник Маурицио Кателан. Поставена е на плоштадот Афари во Милано, пред зградата на италијанската берза, која инаку е впечатлив објект од архитектурата во периодот на фашизмот во Италија. Кателан ја опишува скулптурата како антифашистичка изјава. Тој го трансформирал фашистичкиот поздрав во Италија од 1930-тите со отсекување на прстите и осакатување на раката. Уметникот вели дека го критикува тоталитаризмот што ја опустошил Европа во минатиот век. Тој исто така ја коментира и финансиската криза и неговото дело служи како секојдневен потсетник за трговците на миланската берза на кризата.

Скулптурата, во Италија позната и како „Прстот“, беше приватно финансирана и привремено поставена на плоштадот во времето на градоначалничката на Милано, Летиција Морати. По нејзината инсталација на Пјаца Афари, градот и новиот градоначалник, Џулијано Писапија, одлучија да ја задржат скулптурата како постојана поставка најмалку во следните четириесет години.